မုဆိုးမရွာ

မနက်ခင်းရဲ့ အလင်းတန်းနဲ့အတူ ဆန်းကြယ်စွာ ပေါ်ပေါက်လာခဲ့တဲ့ ရွာတစ်ရွာ ရှိပါတယ်။

ထိုရွာမှာ တဲအိမ် ကိုးလုံးနဲ့ မုဆိုးမ ကိုးယောက်သာ အမြဲတမ်း တည်ရှိနေရမည်ဆိုတဲ့ သဘာဝလွန် စည်းကမ်းချက်တစ်ခု ရှိနေပြီး

လူဦးရေ ပိုလာရင်လည်း အကြောင်းပြချက်မရှိ ထွက်ခွာသွားရစမြဲဖြစ်သလို၊ လျော့နည်းသွားရင်လည်း နောက်ထပ်တစ်ယောက်က

သူ့အလိုလို ရောက်ရှိအစားထိုးလာတတ်တာကြောင့် ဤနေရာကို “မြောက်ကျွန်းရွာ” သို့မဟုတ် “မုဆိုးမရွာ” လို့ ခေါ်ဆိုကြပါတယ်။

မမျှော်လင့်ဘဲ လမ်းမှားကာ ဤလျှို့ဝှက်ချက်တွေ ပြည့်နှက်နေတဲ့ ရွာဆန်းကြီးထဲသို့ ‘လရိပ်’ ဆိုသည့် မိန်းကလေး ရောက်ရှိသွားခဲ့ရာကနေ

ဇာတ်လမ်းက စတင်ခဲ့ပြီး၊ လမ်းပျောက်နေတဲ့ ချစ်သူကို ရှာဖွေကယ်တင်ဖို့ ကံတရားရဲ့ လမ်းပြမှုအတိုင်း ‘ပိုင်သူ’ တစ်ယောက်လည်း ထိုထောင်ချောက်ထဲသို့

လိုက်ပါသက်ဆင်းလာခဲ့ရပါတော့တယ်။ ရွာရဲ့ တကယ့်အမှန်တရားကို သိရှိသွားချိန်မှာတော့...

သူတို့နှစ်ဦး ထွက်ပြေးလွတ်မြောက်ဖို့ အကြိမ်ကြိမ် ကြိုးစားခဲ့ကြပေမဲ့ ဆန်းပြားလှတဲ့ ကံကြမ္မာအောက်မှာ စိတ်ပျက်အားလျော့စွာနဲ့ပဲ ပိတ်မိနေခဲ့ရပါတယ်။

စာရေးဆရာ သိုးဆောင်က စာဖတ်သူတွေ ဖတ်ရှုရင်း သွေးပျက်ကျောချမ်းရုံတင်မကဘဲ လူတို့ပြုခဲ့ဖူးတဲ့ မကောင်းမှုအကုသိုလ်တွေရဲ့ နောက်ဆက်တွဲ ‘ကံတူအကျိုးပေး’

သဘောတရားတွေကို အသားပေး ပုံဖော်ထားပါတယ်။ နေ့ဘက်မှာတော့ မြင်ရသူအပေါင်း ငေးမောရလောက်အောင် ကျော့ရှင်းလှပလွန်းတဲ့ ရက်ကန်းသည်မလေး (၉)ဦးဟာ

ညအချိန်ရောက်တဲ့အခါမှာတော့ လုံးဝဆန့်ကျင်ဘက်ဖြစ်တဲ့ နေ့စံညခံ ‘ဝေမာနိကပြိတ္တာ’ ဘုံဘဝသို့ ကူးပြောင်းသွားကြရရှာပါတယ်။

အကျွတ်တရားရရှိဖို့အတွက် ညစဉ်ညတိုင်း အချင်းချင်း ရက်ရက်စက်စက် အပြန်အလှန် သတ်ဖြတ်နေကြရတဲ့အပြင် အဆုံးမရှိတဲ့ ဘုံဘဝထဲမှာ အကြိမ်ကြိမ် သေဆုံးခြင်းတွေကို ကြုံတွေ့ရင်း

ကျွတ်လမ်းအမှန်ကို ရှာဖွေဖို့ ပဟေဠိဆန်ဆန် စိန်ခေါ်မှုတွေကို ရင်ဆိုင်ဖြေရှင်းကြရပုံကို သရဲဝတ္ထု သက်သက်မဟုတ်ဘဲ ဖတ်နေရင်း အသက်ရှူမှားလောက်အောင် ဆွဲဆောင်မှုရှိတဲ့

လျှို့ဝှက်ဆန်းကြယ်မှုတွေနဲ့ ပုံဖော်ထားပါတယ်။

ကျိန်စာသင့် မုဆိုးမရွာရဲ့ ထွက်ပေါက်ပဟေဠိတွေကို ‘လရိပ်’ နဲ့ ‘ပိုင်သူ’ တို့ ချစ်သူနှစ်ဦး ဘယ်လိုရင်ဆိုင် ဖြတ်ကျော်မလဲဆိုတာနဲ့

ရက်ကန်းသည်မလေး ကိုးယောက်ရဲ့ ဝဋ်ကြွေးတွေကကော ဘယ်လိုချုပ်ငြိမ်းမလဲဆိုတာ ရင်တဖိုဖိုနဲ့ စိတ်ဝင်စားစရာ စာနာစရာ ဇာတ်ကွက်ဇာတ်လမ်းတွေနဲ့အတူ

ဘဝအတွက် ဆင်ခြင်စရာ သံဝေဂတရားတွေကိုပါ တစ်ပြိုင်နက် ခံစားကြည့်ရှုရမယ့် Mystery ဇာတ်လမ်းကောင်းတစ်ပုဒ် ဖြစ်ပါတယ်။