မိုးမိသောအိပ်မက်များ

ဒီဝတ္ထုဟာ အတွေးအခေါ်စာအုပ်အထူကြီးတွေကို နှစ်သက်ပြီး ရိုးရိုးသမားရိုးကျ မဟုတ်တဲ့ ထူးခြားတဲ့ အမြင်တွေ ရှိနေတဲ့

ကောင်မလေးတစ်ယောက်ရဲ့ အကြောင်းနဲ့ စတင်ထားတာ ဖြစ်ပါတယ်။

သူမဟာ သူမအပေါ် သံယောဇဉ်ကြီးမားနေတဲ့သူကိုတောင် ‘ချစ်တယ်’ ဆိုတဲ့ စကားလုံးကို ထုတ်ဖော်မပြောဖို့

တားမြစ်ထားတဲ့အထိ တစ်မူထူးခြားတဲ့ အယူအဆ ရှိသူလည်း ဖြစ်ပါတယ်။

ဤကဲ့သို့ မိမိကိုယ်ပိုင်ခံယူချက်တစ်ခုတည်းအပေါ်မှာပဲ အစွန်းရောက်အောင် တင်းခံထားတဲ့ ကောင်မလေးရဲ့ ယုံကြည်ချက်တွေကို

စာရေးဆရာကောင်လေးက စိတ်ရှည်လက်ရှည်နဲ့ အတွေးအမြင်တွေ ပြောင်းလဲလာအောင် စိတ်ပိုင်းဆိုင်ရာ ကုသပျိုးထောင်ပေးတဲ့ ပုံစံမျိုးကို တွေ့မြင်ကြရမှာပါ။

ပထမဆုံး ကြည့်လိုက်ရင်တော့ သာမန်အချစ်ဇာတ်လမ်းတစ်ပုဒ်လို့ ထင်မှတ်မှားစရာ ရှိပေမဲ့ တကယ်တမ်း ဖတ်ရှုတဲ့အခါမှာတော့ စာဖတ်သူရဲ့ အထင်နဲ့ အမြင်ကို လုံးဝလွဲချော်သွားစေမယ့်

အလှည့်အပြောင်းတွေ ပါဝင်နေပါတယ်။

ဇာတ်လမ်းတစ်လျှောက်လုံးမှာ စဉ်းစားစရာ မေးခွန်းပေါင်းများစွာကို ချန်ထားရစ်ခဲ့ပြီး စာဖတ်သူတွေရဲ့ စိတ်နှလုံးကို တစ်စုံတစ်ရာသော အင်အားအသစ်တွေ

ပေးစွမ်းနိုင်မယ့် ထူးခြားတဲ့ ဇာတ်အိမ်မျိုးလည်း ဖြစ်ပါတယ်။

ကိုယ့်ရင်ထဲမှာ တည်ရှိနေတတ်တဲ့ ခွင့်မလွှတ်နိုင်ခြင်းတွေနဲ့ အမုန်းတရားတွေကို ဘယ်လိုနည်းလမ်းမျိုးနဲ့ လျှော့ချပစ်ရမလဲဆိုတာကို

အတွေးကမ္ဘာသစ်တစ်ခုကနေတစ်ဆင့် သိမ်မွေ့စွာ သင်ကြားပြသပေးနေသလို ခံစားရမှာပါ။

အထူးသဖြင့် ‘ချစ်တယ်’ ဆိုတဲ့ စကားလုံးအပေါ် ထားရှိတဲ့ သူမရဲ့ ခံယူချက်က အတော်လေး စိတ်ဝင်စားဖို့ကောင်းပါတယ်။

သူမရဲ့ အမြင်မှာတော့ ဒီစကားလုံးဟာ လွယ်လွယ်ပြောရမယ့် အရပ်သုံးစကားမျိုး မဟုတ်ဘဲ မြင့်မြတ်တဲ့ တန်ဖိုးနဲ့ စင်ကြယ်မှုတွေ

ကိန်းအောင်းနေတယ်လို့ ယုံကြည်ထားပါတယ်။

ရေရှည်မှာ မထိန်းသိမ်းနိုင်ဘဲ ဒီစကားကို ပေါ့ပေါ့ဆဆ သုံးနှုန်းမိကြတဲ့အခါမှာ ဒါဟာ လိမ်ညာလှည့်စားခြင်းတစ်မျိုး ဖြစ်သွားတတ်ပြီး

တန်ဖိုးရှိတဲ့ စကားလုံးတွေ အလဟဿ အလွဲသုံးစားလုပ်ခံရတာကို နှမြောတသဖြစ်နေတတ်တဲ့ သူမရဲ့ စိတ်နေသဘောထားကိုလည်း မြင်တွေ့ရမှာပါ။

ဇာတ်ကောင်တွေရဲ့ အပြန်အလှန် စကားပြောခန်းတွေကတစ်ဆင့် လေးနက်တဲ့ အတွေးအမြင်သစ်တွေကို ပေးစွမ်းနိုင်တဲ့ ရသစာအုပ်ကောင်းတစ်အုပ် ဖြစ်ပါတယ်။