နံရံ၏ အခြားတစ်ဖက်

“ဘယ်လူသား၏ ဘဝတွင်မှ အချိန်ကာလ

လုံလောက်မှုဆိုတာ မရှိပါ။

လူသားအားလုံးသည် မိမိဆန္ဒများ ပြည့်ဝသည်အထိ

လူ့လောကမှာ နေထိုင်ဖို့ အခွင့်အရေး မရကြပါ။

သေခြင်းတရားသည် ဘာကိုမျှမစောင့်၊ မည်သူ့ကိုမျှ မစောင့်ပါ။”

အကယ်၍ မိမိသေဆုံးမယ့်ရက်ကို ကြိုတင်သိမြင်ခွင့်ရခဲ့ရင် လူသားတို့ရဲ့ အတ္တနဲ့ လောဘဒေါသတွေ ငြိမ်းအေးသွားနိုင်မလားဆိုတဲ့ အတွေးစနောက်ခံနဲ့

သေခြင်းတရားရဲ့ အနီးကပ်ဆုံးသဘောကို မီးမောင်းထိုးပြထားတဲ့ ဝတ္ထုတစ်ပုဒ် ဖြစ်ပါတယ်။

ဇာတ်လမ်းရဲ့ အဓိကဇာတ်ကောင် ‘နှောင်းခင်ဇော်’ ဆိုတဲ့ မိန်းကလေးဟာ မိမိဘဝအလှည့်အပြောင်းတွေကို ရှေ့ပြေးနိမိတ်အနေနဲ့ ကြိုတင်သိရှိနိုင်တဲ့

ထူးဆန်းတဲ့ ကံကြမ္မာကို ပိုင်ဆိုင်ထားသူပါ။ အဲ့ဒီအထဲမှာမှ သူမအသက် ၂၄ နှစ်အရွယ်မှာ သေဆုံးရမယ်ဆိုတဲ့ အဟောကတော့ အဆိုးဝါးဆုံး ဖြစ်ခဲ့ပါတယ်။

ခေတ်ပညာတတ်တစ်ယောက်အနေနဲ့ မယုံကြည်ချင်ပေမဲ့ နိမိတ်တွေက တကယ်ဖြစ်လာတဲ့အခါ စိတ်ရောဂါအထူးကုဆရာဝန် ဒေါက်တာ ‘အောင်စည်’ ထံမှာ စိတ်အစွဲအလံတွေ

လျော့ပါးအောင်နဲ့ ဘေးအန္တရာယ်ကင်းဝေးအောင် အထူးကုသမှု ခံယူရပါတော့တယ်။

ထိုသို့ ကုသမှုစည်းဝိုင်းအတွင်းကနေ လူနာနဲ့ ဆရာဝန်ကြား သံယောဇဉ်အမျှင်တန်းခဲ့ကြပေမဲ့ အသက်ချင်း နှစ်ဆခန့် ကွာဟမှုနဲ့အတူ ဒေါက်တာ့ဘက်က အိမ်ထောင်ကွဲတစ်ယောက် ဖြစ်နေခြင်းက

ရှေ့ဆက်ဖို့ အတားအဆီး ဖြစ်နေစေပါတယ်။ သို့သော်လည်း ‘နှောင်း’ ဘက်ကတော့ မိမိရဲ့ မေတ္တာကို အတတ်နိုင်ဆုံး ပွင့်လင်းစွာ ဖော်ပြခဲ့ပါတယ်။

တစ်ဆက်တည်းမှာပဲ ဒေါက်တာ ‘အောင်စည်’ နဲ့ ဇနီးဟောင်း ‘သီ’ တို့ရဲ့ သဘောထားကွဲလွဲမှုကြောင့် အိမ်ထောင်ရေး ပြိုကွဲခဲ့ရတဲ့ အကြောင်းရင်းကလည်း

အိမ်ထောင်ဖက်တွေအတွက် သင်ခန်းစာတစ်ခု ဖြစ်စေပါတယ်။ လောကီအိမ်ထောင်ရေးသုခကို အလေးထားတဲ့ ဒေါက်တာနဲ့ ဝိပဿနာတရား၊ သတ်သတ်လွတ် ဘာသာရေးဘက်မှာပဲ

စိတ်နှစ်ထားတဲ့ ဇနီးဟောင်းတို့ကြားက မတူညီတဲ့ လိုလားချက်တွေက အက်ကြောင်းကြီးမားသွားစေခဲ့တာပါ။

အသက်အရွယ်မရွေး ဘယ်အချိန်မဆို ရောက်ရှိလာနိုင်တဲ့ သေခြင်းတရားကို သတိမူမိစေပြီး၊ ဆရာဝန်နဲ့ လူနာကြားက ရစ်တွယ်မှုတွေအပြင် ကံကြမ္မာရဲ့ သတ်မှတ်ချက်ကို ‘နှောင်း’ တစ်ယောက်

ကျော်လွှားနိုင်မလားဆိုတာ ရင်တဖိုဖိုနဲ့ ဖတ်ရှုရမယ့် စာအုပ်လေးဘဲ ဖြစ်ပါတယ်။